കൂൺ വിഭവങ്ങൾ

1 .കൂൺ കട്ലെറ്റ്  

1. കൂൺ  ചെറുതായി അരിഞ്ഞത് -            300 ഗ്രാം

2. കാരറ്റ്       -                                               -       50 ഗ്രാം 

3 .ബീന്സ്                                                        -    50 ഗ്രാം

4 .സവാള                                                        -     50 ഗ്രാം

5 . ഇഞ്ചി കൊത്തിയരിഞ്ഞത്    -                  ഒരു കഷണം

6 . പച്ചമുളക് കൊത്തിയരിഞ്ഞത്   -              ഏഴ്

7 . മല്ലിയില കൊത്തിതി അരിഞ്ഞത്   -      ഒരു സ്പൂൺ 

8 . കുരുമുളകുപൊടി    -                                ഒരു സ്പൂൺ 

9 . ഉരുളക്കിഴങ്ങ് പുഴുങ്ങി ഉടച്ചത്   -         100 ഗ്രാം

10 . പച്ചപ്പട്ടാണി വേവിച്ചത്         -                    50 ഗ്രാം

11 . മൈദ കുറുകെ കലക്കിയത്        -                 50 ഗ്രാം

12 . റൊട്ടിപ്പൊടി                     -                            250 ഗ്രാം

13 . എണ്ണ                             -                                  400 ഗ്രാം

14 . ഉപ്പ്                           -                                      പാകത്തിന്

തയാറാക്കുന്നവിധം:

ചെറുതായി അരിഞ്ഞ കാരറ്റും ബീന്സും ചൂടാക്കിയ എണ്ണയിലിട്ട് വഴറ്റുക. പകുതി വഴലുമ്പോള് കൂൺ  ചേര്ത്ത് വെള്ളം വറ്റിച്ചെടുക്കുക. ഇതില് ഇഞ്ചി, പച്ചമുളക്, കൊത്തിയരിഞ്ഞ സവാള എന്നിവ ചേര്ത്ത് വേവിക്കുക. ഇതിലേക്ക് മല്ലിയില, ഉപ്പ്(പാകത്തിന്), കുരുമുളകുപൊടി, ഉരുളക്കിഴങ്ങ് പുഴുങ്ങിഉടച്ചത്, പച്ചപ്പട്ടാണി വേവിച്ചത്, എന്നി ചേരുവകൾ  നല്ലപോലെ ചേര്ത്തിളക്കി ഉരുളകളാക്കുക. കട്ലറ്റിന്റെ  ആകൃതിയിൽ   പരത്തി മൈദമാവിൽ  മുക്കി റൊട്ടിപ്പൊടി പുരട്ടി ചൂടായ എണ്ണയിൽ  വറുത്തു കോരുക. രുചികരമായ കൂൺ കട്ലേറ്റ് തയ്യാർ.

2 .കൂണ്‍ സമോസ

ചേരുവകള്‍ (10 എണ്ണത്തിന്)

കൂണ്‍                                       -                     100 ഗ്രാം

ക്യാരറ്റ്                                    -                     100 ഗ്രാം

ബീന്‍സ്                                 -                        100 ഗ്രാം

സവാള                                       -                   100 ഗ്രാം

ഉരുളക്കിഴങ്ങ്                      -                       100 ഗ്രാം

ഗ്രീന്‍പീസ്                              -                       100 ഗ്രാം( വെള്ളത്തില്‍ കുതിര്‍ത്ത്                                                                                                     വെച്ച് വേവിച്ചത്)

ഗോതമ്പ്പൊടി                    -                         250 ഗ്രാം

മുളക്പൊടി                     -                            1 ടീസ്പൂണ്‍

മഞ്ഞള്‍പ്പൊടി                  -                               1/2 ടീസ്പൂണ്‍

വെജിറ്റബിള്‍ മസാല             -                         1 ടീസ്പൂണ്‍  

പച്ചമുളക്, ഇഞ്ചി, വെളുത്തുള്ളി, കറിവേപ്പില, മല്ലിയില,ഉപ്പ് ആവശ്യത്തിന്

തയ്യാറാക്കുന്ന വിധം

പച്ചമുളക്, ഇഞ്ചി, വെളുത്തുള്ളി എന്നിവ ചതച്ച് വെളിച്ചെണ്ണയില്‍ വഴറ്റുക. അതിലേയ്ക്ക് പച്ചക്കറികള്‍ ചെറുതായി അരിഞ്ഞതും വേവിച്ച ഗ്രീന്‍പീസും മുളക്പൊടി, മഞ്ഞള്‍പ്പൊടി, വെജ് മസാല, ഉപ്പ് എന്നിവയും ചേര്‍ത്ത് എണ്ണയില്‍ നന്നായി വഴറ്റിയെടുക്കുക. അതിന് ശേഷം ആട്ടമാവ് ഉപ്പും വെള്ളവും ചേര്‍ത്ത് ചപ്പാത്തി പരുവത്തില്‍ കുഴച്ച് ഉരുളകളാക്കുക. അത് നീളത്തില്‍ പരത്തി ചുട്ടെടുക്കുക. ഇത് കോണ്‍ ആകൃതിയില്‍ ആക്കി അതിനുള്ളില്‍ നേരത്തെ തയ്യാറാക്കി വച്ചിരിക്കുന്ന ഫില്ലിംഗ് നിറയ്ക്കുക. ആട്ടമാവ് പശയാക്കി ഉപയോഗിച്ച് സമോസ കോണ്‍ ആകൃതിയില്‍ ഒട്ടിക്കുക. തിളച്ച എണ്ണയില്‍ സമോസ വറുത്തു കോരുക.

3 .മഷ്റൂം 65

ചേരുവകള്‍

മഷ്റൂം                                  –              400 ഗ്രാം

മൈദ                                      –                1 കപ്പ്

കോണ്‍ഫ്ലോര്‍                       –                  2 ടേബിള്‍സ്പൂണ്‍

കുരുമുളകുപൊടി                –               1 ടേബിള്‍സ്പൂണ്‍

സവാള                                  –                  1 വലുത്

വെളുത്തുള്ളി                      –                 5 അല്ലി

ഇഞ്ചി                                      –                ചെറിയ കഷണം

ടൊമാറ്റോ സോസ്               –                 1 ടേബിള്‍സ്പൂണ്‍

സോയാ സോസ്                   –                 1 ടേബിള്‍സ്പൂണ്‍

കാശ്മീരി മുളകുപൊടി     –                 2 ടേബിള്‍സ്പൂണ്‍

ഉപ്പ്                                          –                 ആവശ്യത്തിന്

വെളിച്ചെണ്ണ                          –                  ആവശ്യത്തിന്

തയ്യാറാക്കുന്ന വിധം

ഒരു പാത്രത്തില്‍ മൈദ, കുരുമുളകുപൊടി, കാശ്മീരി മുളകുപൊടി, ഉപ്പ്, വെള്ളം എന്നിവ ചേര്‍ത്ത് മാവ് പരുവത്തില്‍ നന്നായി കുഴയ്ക്കുക.ഇടത്തരം തീയില്‍ ചീനച്ചട്ടിയില്‍ വെളിച്ചെണ്ണ ഒഴിച്ച്‌ തിളയ്ക്കുമ്ബോള്‍ തുടച്ചു വൃത്തിയാക്കി വെച്ചിരിക്കുന്ന മഷ്റൂം മാവില്‍ മുക്കി എണ്ണയിലിടുക. നല്ല സ്വര്‍ണനിറം ആകുമ്പോൾ എണ്ണയില്‍ നിന്ന് വറുത്തു കോരി എടുക്കുക.ഒരു പാനില്‍ വെളിച്ചെണ്ണ ചൂടാക്കുക. അതിലേക്ക് സവാള അരിഞ്ഞതും വെളുത്തുള്ളിയും ഇഞ്ചിയും പൊടിയായി അരിഞ്ഞതും ചേര്‍ത്ത് നന്നായി വഴറ്റുക. സവാള വാടിക്കഴിയുമ്പോൾ ടൊമാറ്റോ സോസും സോയാസോസും ചേര്‍ത്ത് ഇളക്കുക.വറുത്തു വച്ചിരിക്കുന്ന മഷ്റൂം ചേര്‍ത്ത് നന്നായി ഇളക്കുക. മല്ലിയില പൊടിയായി അരിഞ്ഞ് വിതറുക.

4 .കൂൺ ബിരിയാണി.(പ്രഷർ കുക്കറിൽ തയ്യാറാക്കുന്നത് )

ചേരുവകള്‍

ബിരിയാണി അരി          =                 1 കപ്പ്
കൂൺ  അരിഞ്ഞത്           =                1 കപ്പ്
സവാള                                   =               2 എണ്ണം
നെയ്യ്                                       =                50  ഗ്രാം
കാപ്സികം                          =                2  എണ്ണം
മുളക് പൊടി                       =                1  ടീ സ്പൂൺ
മല്ലി  പൊടി                         =                1  ടീ സ്പൂൺ
മഞ്ഞൾ  പൊടി                 =                ഒരു നുള്ള്
  മസാല                                  =               കറുവ പട്ട ,ഗ്രാമ്പു, ഏലക്ക 1 :2 : 2
കുരുമുളക് പൊടി             =                2  ടീ സ്പൂൺ .
ഏലകായ പൊടിച്ചത്      =                  കാൽ ടീ സ്പൂൺ .
ചെറിയ ഉള്ളി അറിഞ്ഞത് =             2 ടേബിൾ സ്പൂൺ.
ഉപ്പ്                                           =                 പാകത്തിന്
അണ്ടി പരിപ്പ്                       =                 ആവശ്യത്തിന്
കിസ്മിസ്                               =                 ആവശ്യത്തിന്

തയ്യാറാക്കുന്ന വിധം

അരി നന്നായി കഴുകി അതിൽ രണ്ടു കസനം വീതം കറുവ പട്ട, ഏലക്ക, ഗ്രാമ്പൂ എന്നിവയും രണ്ടു ഗ്ലാസ് വെള്ളവും ചേർക്കുക ,ഉപ്പ് പാകത്തിന് ചേർത്തതിന് ശേഷം  പ്രഷർ കുക്കെറിൽ 5 മിനുട്ട് നേരം വേവിക്കുക .
മറ്റൊരു പാത്രത്തിൽ ഉള്ളിയും കാപ്സിക്കവും വഴറ്റി ,കൂൺ ചേർത്തിളക്കി മല്ലിപൊടിയും, മുളക് പൊടിയും മഞ്ഞൾ പൊടിയും ചേർത്ത് ഇളക്കുക.ഗരം മസാല പൊടി ചേർത്തശേഷം വെള്ളം തളിക്കുക.ഉപ്പ് പാകത്തിന് ചേർത്ത് ൫മിനുട്ട് നേരം പാകം ചെയ്യുക. അതിനെ വേവിച്ച അറിയുമായി ചേർത്ത് വഴറ്റിയ ഉള്ളിയും, അണ്ടിപരിപ്പും ,കിസ്മിസും ഇട്ട് അലങ്കരിച്ച്  ചൂടോടു കൂടി ഉപയോഗിക്കുക.


5   .കൂൺ സൂപ്പ് 

ചേരുവകള്‍

കൂൺ                                      =                200 ഗ്രാം
ഉള്ളി                                       =                3 എണ്ണം
വെണ്ണ                                      =                30 ഗ്രാം
കുരുമുളക് പൊടി             =                കാൽ ടീ സ്പൂൺ .
ഏലകായ പൊടിച്ചത്      =                  കാൽ ടീ സ്പൂൺ .
ചെറിയ ഉള്ളി അറിഞ്ഞത് =             2 ടേബിൾ സ്പൂൺ.
വെള്ളം                                     =              രണ്ടു കപ്പ്
 കോൺഫ്‌ളോവർ               =               1   ടേബിൾ സ്പൂൺ
പാൽ                                        =                 2 കപ്പ്
മുട്ട                                             =                1
ഉപ്പ്                                           =                 പാകത്തിന്

തയ്യാറാക്കുന്ന വിധം

  വെണ്ണ ഉരുക്കി അതിൽ ഉള്ളിയും അറിഞ്ഞ കൂണും വഴറ്റുക. കോൺഫ്ലോർ പാലിൽ ചേർത്ത് നന്നായി ഇളക്കുക. ഈ മിശ്രിതത്തെ കൂൺ കഷ്ണങ്ങളിലേക്ക് ചേർത്ത് 10 മിനുട്ട് നന്നായി തിളപ്പിക്കുക.മുട്ടയുടെ വെള്ള പതപ്പിച്ച് ഇതിലേക്ക് ചേർത്തിളക്കുക.കുരുമുളക് പൊടിയും ,ഏലക്കാപൊടിയും പാകത്തിന് ഉപ്പും ചേർത്ത് ചെറു ചൂടോടെ ഉപയോഗിക്കുക.

6.കൂൺ അച്ചാർ 

ചേരുവകൾ

1.   കൂൺ                 -     250 ഗ്രാ

2  ഇഞ്ചി                                 -        1 ടീ സ്പൂൺ 

3  വെളുത്തുള്ളി         -        1 ടീസ്പൂണ്                  4. മുളകുപൊടി                      -     2 ടേബിൾസ്പൂൺ                      5. ഉലുവ പൊടി          -       1/2 ടീസ്പൂൺ                            6 .കായം                -       ഒരു നുള്ള് 

7 .വിനാഗിരി                         -        2 ടേബിൾസ്പൂൺ                8. എള്ള് എണ്ണ                     -          2-3 ടേബിൾ

തയ്യാറാക്കുന്ന വിധം

1.  കൂൺ ചെറുതായി മുറിച്ചത് 1/2 ടീസ്പൂൺ മുളകുപൊടി, 1/4 ടീസ്പൂൺ മഞ്ഞൾ പൊടി, ഉപ്പ് എന്നിവ ചേർത്ത് കുറച്ച് നേരം മാറ്റി വെക്കുക..

2. പാത്രത്തിൽ എണ്ണ ചൂടാക്കി ഈ കൂൺ അതിൽ ചേർക്കുക. 
     കൂൺ വേവുന്നത് വരെ  ഉയർന്ന ചൂടിൽ പാകം ചെയ്യുക. 
  വെന്ത ശേഷം  കൂൺ മാറ്റി വയ്ക്കുക.

3.  ഈ   പാത്രത്തിൽ കടുക്  ചേർക്കുക. കടുക് പൊട്ടാൻ  തുടങ്ങുമ്പോൾ, കറിവേപ്പിലയും കായവും  ചേർക്കുക.

4.  അരിഞ്ഞ ഇഞ്ചി, വെളുത്തുള്ളി എന്നിവ ചേർത്ത് മൂപ്പിക്കുക .

5.   മുളകുപൊടി, ഉലുവ പൊടി, ഉപ്പ് എന്നിവ ചേർത്ത് ചൂടാക്കുക.നേരത്തെ മാറ്റിവച്ച വേവിച്ച കൂൺ ഇതിൽ ചേർത്ത് നന്നായി ഇളക്കുക.

6.  വിനാഗിരി ചേർത്ത്  നന്നായി ഇളക്കുക.  തണുത്ത ശേഷം വൃത്തിയുള്ള പാത്രത്തിലേക്ക് മാറ്റി വെക്കാം.
  കൂൺ അച്ചാർ  ഫ്രിഡ്ജിൽ സൂക്ഷിക്കാവുന്നതാണ്.

കൂൺ കൃഷി

ചിപ്പിക്കൂൺ കൃഷി കേരളത്തിലെ കാലാവസ്ഥക്ക് അനുയോജ്യം ആണ്. 

പോളിത്തീൻ കവറുകളിലാണ് ഇവ വളർത്തിയെടുക്കുന്നത്. വലിയ ദ്വാരങ്ങളുള്ള പ്ലാസ്റ്റിക് ബക്കറ്റുകളും ഉപയോഗിക്കാവുന്നതാണ്.

സാധാരണയായി വൈക്കോലാണ് കൃഷിചെയ്യാനുള്ള മാധ്യമം.

 പകരമായി റബ്ബർതടിയുടെ  അറക്കപ്പൊടി, ചേരിപ്പൊടി (കൊക്കോപിറ്റ്‌)  എന്നിവയും ഉപയോഗിക്കാറുണ്ട്.

ഒരു ചെറിയ മുറി (100 ച . അടി )ഇതിനായി ഉപയോഗിക്കാൻ കഴിഞ്ഞാൽ നന്നായിരിക്കും.ഓല ഷെഡുകളും ജി ഐ പൈപ്പ് ഉപയോഗിച്ച് നിർമിക്ക്യന്ന റൂമുകളും ഉപയോഗിക്കാം.നല്ല ഈർപ്പവും വായു സഞ്ചാരവും ഉറപ്പിക്കണം.

  

ഉപയോഗിക്കുന്ന വൈക്കോൽ പുതിയതായിരിക്കണം. അവ ചെറിയ കഷ്ണങ്ങളായി മുറിക്കുകയോ,

ചെറിയ ചുരുളുകളായി ചുരുട്ടിയെടുക്കുകയോ   ചെയ്യാം.

ഇവ രാത്രി ശുദ്ധജലത്തിൽ കുതിർക്കാൻ വെക്കുക.

അടുത്ത ദിവസം രാവിലെ അധികമായി ഉള്ള വെള്ളം വാർന്നുപോകാൻ അനുവദിക്കുക.

ഇത് തിളയ്ക്കുന്ന വെള്ളത്തിൽ 15 -30  മിനുട്ട് തിളപ്പിക്കുക .

ഇത്ഒ രു പ്ലാസ്റ്റിക് ഷീറ്റിലോ കടലാസ്സിലോ വിതറിയിടുക .

തണുത്തതും ഈർപ്പമുള്ളതുമായ വൈക്കോൽ ഉപയോഗിച്ച് കൂൺ ബെഡ് ഉണ്ടാക്കാം.

സാമാന്യം കട്ടിയുള്ള പോളിത്തീൻ കവർ ഉപയോഗിക്കാം.

25 സെന്റി മീറ്റർ വ്യാസവും 50 സെന്റിമീറ്റർ നീളവും ഉള്ള കവറുകൾ ഉപയോഗിക്കാം.ഇവക്കു  അങ്ങിങ്ങായി ചെറിയ ദ്വാരങ്ങൾ ഇടണം.

കവറിന് അടിഭാഗം ഏതാണ്ട് 10 സെന്റിമീറ്റർ ഉയരത്തിൽ തയ്യാറാക്കിയ വൈക്കോൽ വിരിച്ച് അതിനു മുകളിൽ അല്പം സ്പോൺ (വിത്ത്) വിതറുക.വീണ്ടും വൈക്കോൽ ലയർ ഇട്ട് വിത്ത് ഇടുക ഇങ്ങനെ കവറിനു മുകൾഭാഗം വരെ ഇടാവുന്നതാണ്.അതിന് ശേഷം കവറിന് മുകൾഭാഗം കെട്ടുക.

ഈ നിറച്ച കവറുകൾ നല്ല ഈർപ്പമുള്ള ഇരുട്ട്മുറിയിൽ ഭദ്രമായി സംഭരിച്ച് വെക്കുക.

പത്ത് പതിനഞ്ചു ദിവസം കൊണ്ട് കവറിനകത്ത് കൂണിന്റെ വളർച്ച വെളുത്ത പൂപ്പൽ പോലെ പടർന്നു പിടിച്ച് കാണാം.

അപ്പോൾ അവ പുറത്തെടുത്ത് കവർ നീക്കം ചെയ്യാം . ഇതോടെ  കൃഷിയുടെ ആദ്യ സ്റ്റേജ് പൂർത്തിയായി .

ഈ കൂൺബെഡ് തട്ടുകളിൽ അടുക്കിവെക്കുകയോ,ഉറിപോലെ കെട്ടിത്തൂക്കിയോ സംരക്ഷിക്കാം.

മുറിക്കകത്തും വൈക്കോൽ അട്ടിയിലും ഈർപ്പം ഉറപ്പാക്കണം.                                ഇതിനു രണ്ടു നേരം സ്പ്രേയർ ഉപയോഗിച്ച് വെള്ളം തളിക്കാം.

നാലഞ്ചു ദിവസത്തിനകം കൂൺ മൊട്ടുകൾ വളരും.

അടുത്ത മൂന്നു നാല് ദിവസം കൊണ്ട് തന്നെ ഇവ വിളവെടുക്കാം.

തുടർന്ന് ഒരാഴ്ച്ച തുടർച്ചയായ വിളവ് ലഭിക്കും.

ഇത് അതാത് ദിവസം ഉപയോഗിക്കണം.

ഫ്രിഡ്ജിൽ പോളിത്തീൻ കോവേരിൽ അഞ്ചാറ് ദിവസത്തേക്ക് സൂക്ഷിക്കാം.

അധികം ഉള്ളത് ഉണക്കി സൂക്ഷിക്കാം.

ഉപയോഗിക്കുന്നതിന് മുമ്പ് ഉണക്കക്കൂൺ 15 മിനുട്ട് ചെറു ചൂട് വെള്ളത്തിൽ താഴ്ത്തിയ ശേഷം ഉപയോഗിക്കാം.

ഇന്ന് വിപണിയിൽ ചിപ്പികൂണിന് 100 ഗ്രാമിന് 70 രൂപ വരെ വിലയുണ്ട്.

ഒരു പാക്കറ്റ് വിത്ത് (സ്പോൺ) മൂന്നു കിലോ വൈക്കോലും കുറച്ച് സമയവും ഉണ്ടെങ്കിൽ ഒരു മാസത്തിനകം ഒന്നര കിലോ വരെ വിളവ് ലഭിക്കും.ഉത്പാദന ചെലവ് 200  രൂപയിൽ കുറവ് മാത്രമേ വരുക  ഉള്ളൂ .

ജൈവ വള നിർമ്മാണവും ഉപയോഗ രീതിയും.

പച്ചിലകൾ, കരിയില , ചാണകം ,വെണ്ണീർ എന്നിവ കൃഷിയിടത്തിലെ പ്രധാന ജൈവ വളങ്ങൾ ആണ് .
ദ്രാവക വളങ്ങളുടെ നിർമാണം ജൈവകൃഷിയിൽ ഒഴിച്ചുകൂടാൻ പറ്റാത്തതാണ്.
ഒരു  ചെടിക്ക്  ആവശ്യമായ  വളങ്ങള്‍ പലപ്പോഴായി കൊടുക്കുന്നതാണ്  നല്ലത് .

1 .ചാണക വളം.

നമ്മൾ അടിവളം ആയി ഉണക്കചാണകം ചേര്‍ക്കാറുണ്ട് എന്നാൽ ചാണകം വെയിലിൽ ഇട്ട് ഉണക്കി ഉപയോഗിച്ചാൽ  ചാണകത്തിലെ ഉപകാരികളായ പല സൂക്ഷ്മ ജീവികളും  നശിച്ചുപോകാൻ സാധ്യത ഉണ്ട്.

പച്ചചാണകം ശേഖരിച്ച് വലിയ മരങ്ങളുടെ തണലിൽ ‍ കൂട്ടിയിട്ട്  അതിനുമുകളിൽ ചണചാക്കോ  മറ്റോ പൊതിയുകയോ , പച്ച ചാണകം ചാക്കിൽ നിറച്ച് കെട്ടിവച്ചോ  അഴുകാൻ ‍ അനുവദിക്കുകയോ ചെയ്യുക..

അങ്ങനെ അഴുകി പൊടിഞ്ഞ് കിട്ടുന്ന ചാണകത്തിന് ഗുണം കൂടുതലായിരിക്കും.

ചാണകമോ കടലപ്പിണ്ണാക്ക് വളമോ  മറ്റെന്തെങ്കിലും വളമോ  ഒഴിക്കുമ്പോൾ  നല്ലവണ്ണം നേര്പിച്ചേ ഒഴിക്കാവൂ  . 

അത് അടിയിൽ  ചെന്ന് കട്ടിയാകുമ്പോൾ  നീമവിര  വേരിന്‍റെ പുറത്തുള്ള മാംസളമായ ഭാഗം തിന്നുകയും .ചെടി മുരടിക്കാൻ ഇടയാക്കുകയും ചെയ്യും.

2 .മുരിങ്ങ ഇല സ്പ്രേ :

തൊണ്ണൂറു ദിവസത്തിലധികം മൂപ്പുള്ള മുരിങ്ങയില നന്നായി അരച്ചെടുത്ത് 

നന്നായി അരിച്ചു  കിട്ടുന്ന നീര്,  അതിന്‍റെ    ഇരുപത്തിയഞ്ചു  ഇരട്ടി വെള്ളവും ചേര്‍ത്തു നന്നായി കൂട്ടിയോജിപ്പിച്ചു ചെടിയുടെ ഇലകളിൽ     സ്പ്രേ ചെയ്തു കൊടുക്കുക,

ഇത്  വളർച്ചാ ത്വരകം ആയി പ്രവർത്തിക്കുകയും നന്നായി 

വിളവു കിട്ടുന്നതിനു സഹായകമാവുകയും ചെയ്യും. 

ഈ  ലായിനി അഞ്ചു ദിവസം വരെ സൂക്ഷിച്ചു വെച്ചു ഉപയോഗികാവുന്നതാണ്.

ഈ പ്രയോഗം മാസത്തിൽ  രണ്ടു തവണ ചെയ്താൽ  മുപ്പതു ശതമാനം വരെ 

വിളവു കൂടുതൽ ലഭിക്കുന്നതാണ്.

3.ചാണക/പിണ്ണാക്ക് / ദ്രാവക വളം 

1. പത്ത് കിലോ പച്ചച്ചാണകം 

2.ഒരു കിലോ കപ്പലണ്ടി പിണ്ണാക്ക്

3.ഒരു കിലോ വേപ്പിൻ ‍ പിണ്ണാക്ക് 

4.ഒരു കിലോ എല്ലു പൊടി

5 .പുളിച്ച കഞ്ഞിവെള്ളം ആവശ്യത്തിന് 

 ഇവ ചേര്ത്ത് വലിയൊരു പാത്രത്തില്‍ അടച്ചു വയ്ക്കുക.

ഓരോ ദിവസവും നന്നായി ഇളക്കിക്കൊടുക്കണം.

 നാലു ദിവസം ഇങ്ങനെ സൂക്ഷിക്കണം. നാലാം ദിവസം വളം തയാർ .

ഒരു കപ്പ് വളം പത്ത് കപ്പ് വെള്ളത്തില്‍ ചേര്ത്ത് ചെടിയുടെ ചുവട്ടില്‍ ഒഴിക്കുക. 

ബാഷ്പീകരിച്ച് വളം നഷ്ടമാകാതിരിക്കാന്‍ വൈകിട്ട് ഒഴിക്കുന്നതാണ് നല്ലത്.

ചെടിയുടെ തണ്ടിനും വേരിനും നേരിട്ട് തട്ടുന്ന വിധം വളം ഒഴിക്കാതിരിക്കുക.

നല്ലവണ്ണം വെള്ളം ഒഴിച്ച് വളം ചെയ്യുക.

4.ഫിഷ് അമിനോ ആസിഡ് :

 ഇതുണ്ടാക്കാൻ ‍ ഒരു കിലോ മത്തിയും ഒരു കിലോ ശർക്കരയും ചേര്ത്ത് പാത്രത്തിൽ ‍ നന്നായി അടച്ച്  തണലിൽ സൂക്ഷിക്കുക. 

ഇടക്ക് തുറക്കരുത്. 

15 ദിവസം കഴിയുമ്പോൾ  ‍ വൈനിന്റെ മണമുള്ള ദ്രാവകം കാണാം. 

അരിച്ചെടുത്ത ശേഷം ഒരു ലിറ്റർ ‍ വെള്ളത്തിൽ ‍ രണ്ട് മില്ലി ചേര്ത്ത് തളിക്കുക .

കീടനിയന്ത്രണത്തിന് ഫിഷ് അമിനോ ആസിഡ് ഫലപ്രദമാണ്. 
കൂടാതെ പൂക്കളുണ്ടാകാനും ഫലത്തിന് വലിപ്പം, നിറം,മണം  എന്നിവയ്കും  സഹായിക്കും

5.പഞ്ച ഗവ്യം.
ജൈവ ഹോർമോൺ ആയും കീട പ്രതിരോധത്തിനും.
പച്ച ചാണകം  4 കിലോ 
ഗോമൂത്രം      5 ലിറ്റർ 
പാൽ          500 മില്ലി 
നെയ്യ്          250 ഗ്രാം
തൈര്         500 മില്ലി 
പാളയങ്കോടൻ പഴം 2 എണ്ണം 

പച്ച ചാണകവും നെയ്യും യോജിപ്പിച്ച് ഒരു ദിവസം വെക്കുക.
ഇതിലേക്ക് പാൽ ,ഗോമൂത്രം , തൈര് ,പഴം ചതച്ച്ത് എന്നിവ അല്പാല്പം ചേർത്ത് ഇളക്കുക.തണലിൽ ദിവസേന ഇളക്കുക.15 ദിവസത്തിനു ശേഷം പത്തിരട്ടി വെള്ളം ചേർത്ത് ആഴ്ചയിൽ ഒരുവട്ടം എന്ന തോതിൽ തളിക്കാം.